Metais de Galicia

A minaría metálica foi un sector con longa historia en Galicia. Desde a Prehistoria ata finais do século XX, extraéronse produtos valiosos como cobre, estaño, ferro, carbón, volframio, chumbo-zinc, ouro e prata, entre outros. Non obstante, co cambio no ciclo económico e a globalización do mercado mundial de materias primas coa entrada dos países asiáticos, os metais de Galicia deixaron de ser interesantes para a minaría.

Con todo, co desenvolvemento tecnolóxico do século XXI e a súa demanda crecente de materias primas, os metais das minas antigas de Galicia volveron ter un valor de mercado suficiente. Polo tanto, desde o inicio da década de 2010, iniciáronse varios proxectos mineiros que aínda non foron postos en marcha ou que non alcanzaron niveis de produción óptimos.

Coltan galego

Galicia ten a única mina de coltan do sur de Europa, operada desde 2013 en Viana do Bolo (Ourense) por Strategic Minerals. É unha mestura de minerais columbitas (columbio ou niobio) e tantalio. O coltan é un mineral crítico para a fabricación de compoñentes electrónicos, extremadamente raro no mundo e cuxa principal produción está en países en conflito. Por este motivo, o coltan de Galicia é un “produto libre de conflitos”, xa que a súa extracción na Unión Europea, cos seus altos estándares de seguridade xurídica e laboral, permite unha completa rastrexabilidade.

Cobre de Galicia

A produción de cobre na comarca de Touro-O Pino foi unha constante ata 1986, cando houbo un cesamento temporal desta actividade. O baixo prezo do metal nos mercados internacionais deixou a mina por baixo do limiar de rendibilidade. Non obstante, coa volta da demanda internacional na segunda década do século XXI, comezaron os procedementos para a reapertura e a expansión da mina, que aínda non entrou na fase de produción.

Volframio ou tungsteno

Nas primeiras décadas do século XX, especialmente durante as dúas guerras mundiais, disparouse a demanda internacional de volframio ou tungsteno. A capacidade deste metal para endurecer o aceiro fíxoo indispensable para a industria militar. Por conseguinte, os contendentes buscaron subministración en Galicia, onde se extraeu o volframio no Barbanza e na Costa da Morte (A Coruña), así como en diferentes rexións de Ourense. Coa caída da demanda internacional de metais, as explotacións pecharon a finais do século XX.

Do mesmo xeito que no resto de metais, a demanda foi reactivada no século XXI, polo que unha iniciativa empresarial obtivo unha licenza para extraer volframio da mina de San Finx en Lousame (A Coruña). As primeiras producións foron escasas, pero prometedoras. Non obstante, desde finais de 2017, a falta de permisos ambientais deixou á mina sen produción.

Estaño

O estaño foi un dos primeiros metais que se empregaron en Galicia na Prehistoria. A súa explotación en varias minas detívose a finais do século XX, pero foi reactivada na década de 2010, coa reapertura (e posterior parálise) da mina de San Finx e coa extracción de cantidades significativas na mina de coltan de Viana do Bolo (Ourense), como coproduto da principal actividade mineira.

Ouro

A extracción de ouro ten unha gran tradición en Galicia, este metal precioso foi empregado dende a Prehistoria e ocupou un lugar moi destacado na Gallaecia romana. Na actualidade non hai ningunha mina de ouro en activo en Galicia. Non obstante, en Salvaterra de Miño (Pontevedra) a compañía Áridos do Mendo, centrada na producción de áridos, adica parte dos seus recursos á explotación do ouro procedente do xacemento fluvial de onde extrae as gravas e areas.