Que teñen en común a Praza de Tiananmen en Pequín, a sede do Parlamento Europeo en Bruxelas, a Porta do Sol en Madrid e a Catedral de Santiago de Compostela? En todas estas construcións foi utilizado como elemento común: o granito de Galicia. Unha pedra de uso histórico que conta cunha grande importancia a nivel internacional.
Pero das canteiras galegas tamén saíu o granito que forma gran parte do metro en París e Londres, do concello de Tokio, do Museo de Arte Moderna de Nova York ou dos aeroportos de Hong Kong ou Dubai.
Esta pedra é moi especial para a comunidade galega. Galicia conta cunha materia prima cuxa calidade é recoñecida a nivel internacional. A súa extracción concéntrase na zona do Porriño, na provincia de Pontevedra, aínda que existen importantes explotacións na provincia de Ourense e Lugo. Os principais destinos do granito galego son os Estados Unidos, Turquía, Marrocos e Francia. Estes países reciben o 60% das exportacións totais, cun valor de preto de 78 millóns de euros.
Unha pedra de importancia mundial
A industria galega do granito é a segunda máis importante de Europa, só por detrás de Italia, e a quinta a nivel mundial, detrás da China, India, Brasil e Italia. Segundo información oficial do Cluster do Granito de Galicia, as exportacións creceron no ano 2016 por sétimo ano consecutivo ata acadar un récord de 127 millóns de euros. E o certo é que o sector do granito utilizou unha estratexia de expansión cara aos mercados estranxeiros para afrontar a crise da construción española a raíz da crise económica, unha expansión que segue a crecer ano tras ano.
As exportacións crecen tanto en granito ornamental coma procesado, en gran parte debido á reorientación das empresas galegas cara a novos mercados. O granito da zona do Porriño concentra o 97% das vendas ao estranxeiro, convertendo a Galicia na rexión líder nacional no sector da pedra natural.
De xaneiro a setembro de 2016, Europa foi a zona do mundo con maior importancia para as exportacións de granito bruto galego, o que supón o 84% da cota de mercado. As vendas ao exterior de bloques de granito chegaron a 13 millóns de euros durante o mesmo ano.
O granito como fonte de riqueza para Galicia
Galicia é unha das zonas extractoras de granito máis importantes e un dos motores fundamentais da economía galega. A zona do Porriño, onde se concentra o maior número de canteiras de granito en Galicia, depende deste material para o seu desenvolvemento social e económico.
A industria do granito xorde en Galicia como unha extracción de bloques de pedra destinados á exportación e a un restrinxido mercado nacional. Pero, durante os anos oitenta, vendo o florecente negocio da transformación, os empresarios galegos comezan a incorporar no seu proceso produtivo a transformación do granito, o que permite multiplicar por 10 o valor da materia prima en bruto.
Deste xeito, foméntase a creación dun emprego máis tecnicamente especializado na zona, xa sexa para mellorar as técnicas de extracción do granito, así como para o posterior tratamento da pedra. Só en 2016, o sector industrial do granito empregou a 471 persoas de maneira directa, cifra que acumula catro anos consecutivos de aumentos. Pero é que de maneira indirecta, emprega ao redor de 2.000 persoas, polo que o desenvolvemento da industria contribuíu á transformación do sector, sendo esencial para aumentar a súa capacidade de aportar valor engadido ao produto final.
Ademais, durante o 2016, o 15% das mercadorías que se moveron no porto de Vigo foron granito. Máis de medio millón de toneladas de produto, tanto na súa versión en bruto como elaborado. Deste xeito, o porto de Vigo é o terceiro a nivel mundial en canto a tráfico de pedra natural.
A clave do éxito deste material é a súa homoxeneidade e a competitividade do seu prezo. Na actualidade, o granito xa non só provén das canteiras galegas, senón que tamén se procesa a pedra importada doutros países, que se prepara en Galicia para ser usada como material de construción en todo o mundo.
A presenza do granito galego en numerosos edificios e construcións nas cidades máis importantes do mundo corrobora a importancia desta industria a nivel mundial, xa que experimentou un forte impulso nos últimos anos. Todo parece indicar que a industria do granito en Galicia goza de boas perspectivas de futuro, xa que as reservas desta materia prima son abundantes e de gran calidade, conta cunha forza de traballo altamente cualificada e experimentada e unha poderosa capacidade de expansión e de transformación.
Galicia, grazas á súa riqueza xeolóxica, ten os maiores xacementos de pedras ornamentais de España, polo que é capaz de abastecer aos principais mercados mundiais.
