A minería en Galicia é moito máis ca unha actividade extractiva: é un piar fundamental para a economía e o desenvolvemento social, especialmente nas áreas rurais. Fronte ao reto do despoboamento e á necesidade de xerar oportunidades de calidade fóra dos grandes núcleos urbanos, o sector mineiro galego consolídase como un motor de emprego estable, cualificado e inclusivo.
Imaxe: 89stocker vía Canva
Situación actual: emprego directo, indirecto e feminino
Segundo datos de 2023, a minería galega xera 4.616 empregos directos repartidos en 246 instalacións mineiras activas. Esta cifra cobra aínda máis valor se se considera o carácter rural e a dispersión xeográfica de moitas destas explotacións, que operan a través de 128 empresas.
O efecto multiplicador do sector é notable: máis de 10.000 empregos indirectos dependen da minería, especialmente en servizos auxiliares, transporte, subministracións, mantemento, aloxamento e restauración. Por cada emprego directo que se crea nunha mina, nacen entre 2 e 4 postos de traballo adicionais na economía local, fortalecendo o tecido produtivo e comercial das comarcas mineiras.
Cómpre salientar tamén a crecente participación feminina: 936 mulleres traballan xa na minería en Galicia, representando o 21,04 % do total de empregos do sector; un dato que reflicte a evolución cara a un sector máis inclusivo e aliñado cos retos de igualdade de oportunidades e diversidade.
Efecto tractor: os novos proxectos mineiros
O potencial da minería galega para xerar emprego de calidade refórzase coa reactivación e posta en marcha de novos proxectos estratéxicos, centrados en minerais críticos para a transición enerxética e a independencia tecnolóxica europea. Eis dous dos exemplos máis destacados:
- Mina de Doade (Ourense)
En fase de desenvolvemento, este proxecto xerará 320 empregos entre directos e indirectos, abrindo oportunidades de negocio para empresas locais de servizos e mantemento, así como para a loxística e a vixilancia. - Mina de Touro – O Pino (A Coruña)
Considerado proxecto estratéxico pola Xunta desde xuño de 2024, este xacemento de cobre prevé a creación de 421 empregos directos e 1.200 empregos indirectos. O seu impacto positivo esténdese a sectores primarios como a agricultura, a gandaría e a silvicultura, así como á dinamización de servizos, transporte e obras públicas.
Ambos os dous casos ilustran o efecto tractor da minería moderna: cada novo proxecto activa unha cadea de valor que beneficia o conxunto do territorio, desde o emprego directo e a dinamización do comercio local ata a chegada de novas infraestruturas e a consolidación de servizos públicos.
Impacto social: fixación de poboación e desenvolvemento rural
O impacto social da minería en Galicia é especialmente visible nas zonas rurais e menos densamente poboadas. Nestes territorios, os proxectos mineiros actúan como motores económicos locais, fixando poboación, atraendo novas familias e ofrecendo oportunidades laborais que, doutro xeito, serían difíciles de atopar fóra dos grandes centros urbanos.
Non só se trata de emprego directo e indirecto, senón de toda unha cadea de servizos auxiliares e infraestruturas que se ven reforzadas: escolas, centros de saúde, transporte, comercio, hostalaría e actividades culturais.
Por todo isto, o impacto no mercado laboral é tanxible e crecente, convertendo Galicia nun referente de emprego de calidade e resiliencia territorial. A dixitalización, a transición ecolóxica, a diversificación de perfís e a formación técnica abren a porta a novos empregos verdes e a unha maior especialización da man de obra local.
