En Galicia temos a sorte de ser unha das rexións con maior riqueza de augas minerais de toda España, onde o seu aproveitamento remóntase á época romana.
A auga mineral procede de acuíferos subterráneos protexidos de calquera contaminación externa e que manteñen a súa pureza e os sales minerais que as fan únicas e saudables.
Podemos dicir que as augas minerais galegas chegan a nós directamente do manancial ás nosas mans. O proceso de produción en calquera planta de auga mineral natural de Galicia é moi sinxelo e cun mínimo impacto no medioambiente.
Unha vez que a auga sae do acuífero procédese inmediatamente ao seu embotellado tras pasar os controis de calidade necesarios. E son as botellas as que permiten a conservación da auga para que podamos hidratarnos e gozar dos seus sabores únicos coa garantía de que estamos a consumir un produto seguro e de calidade.
Agora falemos de cifras: en Galicia existen dez plantas de auga mineral natural que empregan de forma directa a máis de 300 homes e mulleres, sobre todo en zonas do rural, e que producen ao ano un total de auga envasada de 292.403.112 litros. Destes 300 traballadores unha alta porcentaxe traballa na zona de envasado: isto inclúe a fabricación das botellas, a envasado da auga e o control de calidade.
Os envases PET e as augas minerais
Os envases PET son envases de plástico habitualmente transparentes, reciclables e seguros para a saúde, por iso son os máis aptos para envasar alimentos. Ademais, teñen gran resistencia a axentes externos. Este tipo de recipientes están fabricados cun tipo de polímero chamando polietileno tereftalato e recoñéceselles polas siglas do seu nome en inglés, PET.
O uso dos envases de plástico PET para o embotellado de augas garante seguridade e unha óptima conservación do produto que contén, ao ser un material moi inocuo. A súa fabricación é económica ao realizarse en liñas completamente automáticas e en series longas e minimiza o impacto ambiental ao estar fabricados en gran parte con materiais reciclados e sobre todo, reciclables.
As botellas PET son cento por cento reciclables, de feito, é o material que máis reciclamos en España. Estas botellas, do mesmo xeito que outros envases fabricados con termoplásticos, teñen o mesmo comportamento na súa reciclaxe que os metais ou o vidro, é dicir, pódense reciclar de maneira infinita.
O papel do envasado das augas minerais na economía circular
O sector da auga mineral natural en Galicia estivo sempre centrado na sustentabilidade e no coidado do medioambiente. As plantas de augas minerais son as primeiras interesadas en que os nosos ecosistemas estean libres de contaminación, xa que a auga só pode chegar ao consumidor final se brotou dun manancial cuxa contorna está libre de contaminación.
Pero o compromiso das marcas de auga mineral de Galicia non se limita á súa contorna próxima, senón que nos últimos anos puxo o foco nun obxectivo máis global: reducir a cantidade de residuos que xera.
Para reducir o impacto ambiental dos envases de plástico, o sector das augas propúxose varios retos para 2030, mediante medidas que xa se están levando a cabo:
- Reutilización: o sector de augas realiza un importante esforzo de loxística inversa para a distribución dos seus envases reutilizables. As botellas de vidro empréganse sobre todo en hoteis, restaurantes, bares e cafeterías, e estas volven de novo á planta para a súa reutilización. Mentres que, para a entrega a domicilio e a empresas, utilízanse grandes garrafas de policarbonato.
- Redución: segundo Aneabe (Asociación de Augas Minerais de España), cada vez o peso das botellas é máis lixeiro e o uso de PET reciclado na fabricación das botellas máis habitual. Na actualidade o uso deste material reciclado é do 20%, pero o obxectivo é chegar ao 30% en 3 anos e ao 50% en 2030. Cabe destacar, ademais, que o sector da auga mineral natural produce 0 residuos industriais.
- Reciclaxe: podemos presumir de ser un país que recicla, xa que na actualidade as botellas de auga que van parar ao colector amarelo ascenden ao 87%. Para Aneabe, esta cifra deberá incrementarse ata o 95% para cumprir os Obxectivos do Desenvolvemento Sostible.
Como podes ver, o sector das augas minerais está plenamente comprometido coa sustentabilidade e demóstrao coa aposta por envases provenientes da economía circular. Pero isto só é posible se todos achegamos o noso granito de area e deixamos a botella baleira no colector adecuado.
