No corazón da tradición e a innovación da pedra natural galega atópase Adrián Otero, mestre canteiro e docente no CIFP de Cantería de Galicia. A súa paixón polo oficio naceu ao observar de preto o traballo dos canteiros, quen sabiamente lle recomendaron visitar a escola de cantería. Foi alí cando descubriu de primeira man as posibilidades creativas e construtivas do material, o que lle fixo recoñecer rapidamente que “iso era o seu”.
Nesta entrevista, Adrián Otero reivindica o valor da pedra natural como material construtivo e artístico, poñendo o foco na importancia do granito para Galicia e na calidade excepcional que distingue ao producido na nosa comunidade. Ademais, defende a modernización que viviu o oficio nos últimos anos como o camiño ideal para acadar unha minería e unha cantería máis sostibles, adaptadas aos retos actuais.
Otero remata poñendo en valor o papel dos canteiros galegos, auténticos embaixadores dunha tradición que combina arte, técnica e respecto polo contorno. O seu testemuño é unha invitación a redescubrir a riqueza da pedra natural e o potencial dunha profesión que segue evolucionando sen perder as súas raíces.
Podes ver a continuación a entrevista completa que lle realizamos no marco da feira Stonegal 2025:
